Şokolad Kistasının Partlaması

Ən çox soruşulan və maraqlanılan mövzulardan biri, şokolad kistasının partlama ehtimalı və partlarsa nə olacağıdır.

Endometrioz, yəni şokolad kistası xəstəliyi, tez-tez reproduktiv yaşda 10 qadından 1-ində rast gəlinən və adətən sinsi irəliləyən bir xəstəlikdir. Şokolad kistası xəstəliyi bəzi qadında bir sancaq başı boyda kiçik bir zədə həyat keyfiyyətinə önəmli dərəcədə mənfi təsir etdiyi halda, bəzisində bir qoz, hətta limon böyüklüyündə olub heç bir əlamət vermir.

Ən çox rast gəlinən əlamətləri isə xroniki yorğunluq, ağrılı aybaşı, ağrılı cinsi əlaqə, sonsuzluq, ishal və qəbizlik, anusdan qanaxma, qanlı nəcis, aybaşı pozğunluğu, aybaşıdan əvvəl ləkələnmə, ağrılı və qanlı sidik ifrazıdır. Lakin dediyimiz kimi bəzi endometriozlu qadınlarda isə heç bir əlamət olmaya bilər, diaqnoz ultrasəslə ya da əməliyyat zamanı görülərək qoyulur. Buradakı müəyyənedici iki önəmli amil ağrı və uşaq istəyidir.

Endometrioz müalicəsində medikal və cərrahi müalicə olmaqla 2 əsas yanaşma var. Ağrı şikayəti ön plandadırsa, dərman müalicəsi də, cərrahi müalicə də məsləhət görülə bilər. Lakin bilinməlidir ki, cərrahi müalicə ağrı üçün ən effektiv üsuldur. Uşağı olan qadınlarda cərrahiyyə ilə əlaqədar məhdudlaşdırıcı vəziyyət olmadığı halda, uşağı olmayanlarda, ikitərəfli şokolad kistası olanlarda və əvvəllər əməliyyat keçirmiş xəstələrdə cərrahi müalicə ön planda düşünülmür. Günümüzdə robot dəstəkli cərrahiyyə ilə uğur nisbəti daha yüksək və rahat müalicə mümkün ola bilir.

Şokolad kistasının divarının cırılaraq kista möhtəviyyatının qarın boşluğuna yayılması çox tez-tez rast gəlinən klinik vəziyyət deyil. Lakin kistanın ölçüsü böyüdükcə divara edilən təzyiq artır. Bu da şokolad kistasının partlamasına səbəb ola bilər. Şokolad kistası cinsi əlaqə, məşq və müayinə zamanı da təzyiq nəticəsində partlaya bilər. Şokolad kistası partladığı anda bıçaq saplanırmış kimi qəfil bir ağrı hiss oluna bilər.

Şokolad kistası partladığı halda kista möhtəviyyatı kistanın yerləşdiyi yumurtalığın üzərinə ya da çanaq nahiyəsindəki digər orqanların üzərinə yayıla bilər. Bu halda infeksiya, orqanların bir-birinə bitişməsi və qasıq ağrısı kimi problemlərə səbəb ola bilər. Kista partladığı halda təcili müdaxilə etmək lazım gələ bilər. Kistanın partlaması nəticəsində qanaxma, yüksək hərarət, ürəkbulanma və qusma ya da şiddətli ağrı görülə bilər. Qarında ciddi bir infeksiya inkişaf edə bilər. Bu tip əlamətləri gördüyünüz halda dərhal həkiminizə müraciət etməlisiniz.